Тохсунньу 11 күнүгэр 1 Малдьаҕар нэһилиэгин Аҕам саастаахтарын үгэскэ кубулуйбут Саҥа Дьыллааҕы көрсүһүүлэрэ буолан ааста. Өр кэмҥэ көрсүбэтэх үөлээннээхтэр көрсүһэн дуоһуйа кэпсэттилэр, культура үлэһиттэрэ бэлэмнээбит эҕэрдэ кэнсиэртэрин көрдүлэр, оонньоон да ыллылар уонна баһылыктарын кытта санаа үллэһиннилэр.

Салайааччылара Алексеева Александра Алексеевна түмсүү аатыттан баһылыкка баҕа санааларын, этиилэрин тириэртэ, өссө да нэһилиэк туһугар бииргэ улэлэһэргэ мэлдьи бэлэмнэрин эттилэр, нэһилиэк бэтэрээннэригэр көмөлөрүн иһин махталларын биллэрдилэр.

Баьылык мустубут дьону Үүммүт үтүө сылынан эҕэрдэлээн туран юбилейдаах бэтэрээннэргэ эҕэрдэ суруктары, сэмэй бэлэхтэри туттартаата. Маны таһынан педагогическай улэ бэтэрээнэ Евдокия Ивановна Егороваҕа Ханалас улууһун “Ыччат наставнига” диэн анал, бочуоттаах бэлиэтэ туттарылынна.

Үөлээннээхтэр өргө диэри үүттээх итии чэй иһэ — иһэ астына кэпсэттилэр, эҕэрдэлэстилэр , ыллаан – туойан, аныгылыы да муусуканан, байаанынан да үҥкүүлээтилэр.

Маны таһынан Тымныы Оҕонньору, Хаарчаананы, кэлбит сыл символа Куобаҕы кытта оҕо саастарын эргитэн хороводтаатылар, бириистээх оонньууга көхтөөхтүк кыттан Тымныы Оҕонньортон бэлэхтэри туттулар.