Кулун тутар 18 күнүгэр, 1-кы Малдьаҕар нэҺилиэгин кэрэ аҥардарыгар «Дьүөгэ» дьахтар форумун «Дьиэрэй ырыа» культуура киинэ уонна олохтоох дьаҺалта бэрт үрдүк таҺымнаахтык тэрийэн ыыттылар. Форумҥа эдэр да эмэн да саастаах элбэх кэрэ аҥар кыттыыны ылла. Форум аҺыллыытын «Сарыада» түмсүү АлгыҺынан арыйда, кыттааччылары Арчылаата, алгыстаах алаадьынан айах туттулар.
Салгыы 4 көрүҥүнэн маастар-кылаастарга тарҕаҺан элбэҕи биллилэр, кердулэр-иҺиттилэр. Ол курдук Ольга Алексеева, нэҺилиэк уран тарбахтааҕа, элбэх оҕолоох ийэ фоамирантан хайдах ньургуҺун сибэккини оҥорорго үөрэттэ, Светлана Шадрина бэйэбит дойдубут эмтээх отторун, отоннорун хайдах хомуйан, хатаран-хаҺаанан, доруобуйаҕа туҺалаах чэйдэри оҥорон туҺанары олус кэрэхсэбиллээхтик кэпсээтэ. НэҺилиэк ааттаах оҕуруоччута Татьяна Голокова — уунээйини хайдах сиэмэтиттэн талартан саҕалаан, хайдах көрөн-харайан үрдүк үүнүүнү ылыахха сөбүн кэпсээтэ, маны таҺынан ыҥырыылаах ыалдьыппыт, Дьокуускай куораттан, СР культуратын туйгуна Сыдьаайа -Анастасия Габышева кэлэн элбэх көрүҥҥэ маастар кылаас ыытта. Ол курдук бэйэни көрүнүү-симэнии, оҥостуу- тупсарыныы, кэрэ буолуу туҺунан, тойукка, хомуска, оҺуокайга уонна дьахталларга эрэ анаан айыллыбыт, туругу бөҕөргөтөр «Каошики» индийскэй йогаҕа үөрэттэ. Эбиэттээн сынньанан ыла-ыла форум хас да чааҺы быҺа буолбутун, бириэмэ ааспытын билбэккэ да хааллылар. Түмүккэ нэҺилиэк көхтөөх кэрэ аҥардарыгар баҺылык Бочуоттаах Грамоталары, Махтал суруктары туттартаата. Форумҥа кыттыбыт дьахталлар дуоҺуйа сынньанан, ирэ-хоро кэпсэтэн, элбэҕи билэн тарҕастылар.