1-кы Малдьаҕар нэһилиэгин «Дьиэрэй ырыа» култуура киинин иһинэн тэриллэн, СӨ култууратын туйгуна Туйаара Петрова салалтатынан үлэлиир «Оберег» уонна «Эркин» ансаамбыллар социальнай үлэһит Людмила Гаврильева ыҥырыытынан Мохсоҕоллоохтооҕу инбэлииттэр уонна кырдьаҕастар дьиэлэригэр баран кэнсиэртээн кэллибит.
Кыамматтарга, ыалдьан, оһолтон, олоххо ыарахан балаһыанньаҕа киирбит дьону баран сэргэхситэн, сүрэхпит сылааһын ырыанан бэлэхтээтибит. Көрөөччүлэрбит олуһун махтаннылар. Бу социальнай дьиэҕэ биһиги нэһилиэкпититтэн Анна Васильевна уонна Елизавета Васильевна Севостьяновалар олороллор. Нэһилиэк бочуоттаах олохтооҕо Петр Чемезов кыра бэлэхтээх тиийбитин тутан үөрүүлэрэ үксээтэ.
Киһи мэлдьи чөл, доруобай, үчүгэй туруктаах сылдьыбат, олоххо араас буолуон сөп. Онон маннык кыамматтары, кырдьаҕастары, олох охсуутун билбит дьону кытта баран билсэн, кэпсэтэн, ыллаан-туойан кэлбиппититтэн бэйэбит да астынныбыт.

Татьяна Ефремова, «Дьиэрэй ырыа» Култуура киинин дириэктэрэ.